قصيدة جديدة
بقالي كتييييييييييييير ما دونتش
وبصراحة ماكانشي ليا نفس خاالص
المهم إن أنا قررت النهارده أرجع أدوّن تاني
مع إني عارف إن الناس تقريبا نسيت مدونتي
بس أنا بحب أكتب وأخرج اللي جوايا بشكا متواصل
يمكن الواحد يخسر من وزن الهموم حبة
ع العموم أنا نفسي أواظب ع التدوين زي زمان
ويا رب أقدر
وع العموم دي قصيدة من ديواني ( أحاسيس مدفوعة الأجر) ياريت تعجبكوا
ع الأصل دوّر
الخوف أصيل
بيصاحب الواحد
على طول الحياة
خايف تعيش .. تموت .. تقول
خايف و بس
أكبر نموذج للصداقه
لو خدت أيامك قصادك
كعب داير
عمرك تلاقي حد
يوفيلك مثاله ؟!
***
كل اللي مكتوب ع الجبين
لازم تشوفه غصب عنك
افتح شبابيكك
و طل على الشوارع
شوف البشر
ماشيين كُتل
أمواج بتتصادم وتتلاحق
و تنهار ع الرصيف
يربط ما بينهم شئ أساسي الخوف
مابيسبشي الطريق
***
لو مرة
حسيت التحدي بيجرفك
أدخل فِ أوضة مقفّلة
غمض عيونك
واعتبر نفسك وحيد
بس افتكر إنّي نصحتك
قبل ما تحاول
الوحدة مش موجودة أصلا
شم الهوا حواليك
هتلاقي ريحة الخوف
رفيق
حارس أمين
***
الباب قصادك افتحه
و اجري
من غير ما تسأل
إيه اللي مستنّيك وراه ؟!
شيل الحسابات الكتيرة
اللي فِ دماغك
جرب تخوض التجربة
جرب تخطي خطوة واحدة
و الخوف
ما يبقاش أُكرة الباب
الوحيدة
***
واقف .. غريبة
ليه ما زقتشي و خرجت
المرة دي
واجب عليك إنك تحاول
اهرب إليك
اقلب شريط القصة
و ابدأ من جديد
حاصر مشاعر خوفك
اضغط
و اجبره يصاحبك
على كيفك
أول ما تحتاجه تلاقيه
أول ما يحتاجك
يخبط ع البيبان
الخوف ماهوش ندل
تلاقيه دايما
بيحميك من حاجات
ممكن تشقلب دنيتك
لكنه أضعف م المطبات و النُقر
و عينيه مابتشوفشي الأمل
***
واحد و بس
هو اللي بيقود المسيرة
و انت الأحق
