خيال .. هارب من البلادة

أول ما السما تمطّر طراطير

يبقا النهاردة عيد ميلاد الأراجوز

وأول ما القمر يقف على دماغه ويتشقلب

يبقا دوره في المسرحية اتغير

وأول ماتقوليلي بحبك

يبقا القيامة قامت والجنة بتفتح ابوابها

وبما إن التلاتة بيجمع بينهم شئ واحد وهو .. الاستحالة

يبقا من حقي أحلم بيهم ... بحرية

****************

امبارح كنت بشيّت مع واحدة من أصدقائي وفوسط الكلام

قولتيلها إن انا نفسي اسافر رومانيا

بلاد التلال السبع

واقابل دراكولا والمذئوب والمونيتور

راحت مقطعاني وقالتلي المونيتور في اليونان

طبعا انا كنت عارف ......... بس زي ماقولتيلها

أنا غاوي أساطير وميتافيزيقا وخيال من غير حدود

وبالتالي خيالي من حقه يجيب المونيتور وميدوسا وهرقل وابوتريكة

ويحطهم في المكان اللي هو عايزه

وبما إن الأساطير عندي مرتبطة دون أسباب بمشهد التلال

والليل و البدر والضباب - وده تخيلي لرومانيا طبعا - فنقلتهم هناك

هما وأساطير تانية كتير

وبعيش معاهم في خيالي زي ما أنا عايز

وما أقولكمش ع الحواديت اللي أنا اخترعتها بقا

بلاوي

ماعلش شاعر بقا ومجنووووووووووووووون

بس المختلف في عندي إني دايما ببقا البطل الوحيد

قصدي الإنسان الوحيد في الحدوتة

وطبعا .. طبعا يعني ببقا خارق وعندي قدرات وبطير وبعوم تحت المايه

كده يعني

ومع إني بعيش مع الأساطير دي كتير

أحيانا بيقاطعني حلم تاني

مكان على المحيط بتحاوطه جبال متغطية بالخضرة

يعني رملة وبحر وشجر وحصنة برية بتجري ... وعيش يا عم بقا

وموجود في وسطه كوخ كبير وواسع بتشاركني فيه هي

هي مين ؟؟؟

صدقوني دايما ملامحها مشوشة

ليه ؟؟!! ما اعرفش

بس أنا نفسي فعلا آخد البنت اللي هايربطني بيها القدر

ونروح بعييييييييييد في مكان زي ده

ونحلم

تفتكروا كده ابقا إنسان حالم

هو أنا بأمانة ما اعتقدش الموضوع ده

أنا إنسان هارب

وطبعا فهمتوا يعني إيه ؟؟

بس يا ترى إمتى ههرب ما ارجعش

**************

المأساة في العادي بتيقا محزنة

لكن عمركوا شوفتوا مأساة مفرحة

أنا بقا شوفت ........ في خيالي

مع الاعتذار للواقع بشدة

الاتحاد الشوفونيري .. رؤية تاريخية 1

بعد تفحيص وتمحيص كتير

وبعد الرجوع للمراجع التاريخية المختلفة

اتضح ان الاتحاد الشوفونيري

هو أول كيان حقيقي في تاريخ الانسان

****************

دي كانت كلمات العالم الأثري والجهبز

علي علي علي الدكروري

صاحب كرسي الأستاذية في علم الأمم

بجامعة نيوأكاونت الدولية

واللي دفعتني بصراحة ني أدور على أصل الموضوع ده

ومن حبي في التاريخ بدأت رحلة البحث الشاقة

وطبعا استعنت بكتاب الدكتور علي علي علي الدكروري

الاتحاد الشوفونيري أصالة تبحث عن الحداثة

واللي بيأكد فيه ان أول ظهور للاتحاد الشوفونيري كان في عصر الديناصورات

وتحديدا في عهد الامبراطور تريناصور السابع عشر

وكان في بداية الأمر عبارة عن خلية سرية تهدف لتحرير البشر

ووضعهم على خريطة العالم

خصوصا بعد الاكتشاف المهم للشق - لقب زي رفيق كده - الشوفونيري التاسع والسبعين

وهو ماعرف بعد ذلك بالنار

وده كان المفجر الأول للفكرة لأنه مع ظهور السلاح الحديث بدل الحربة والسكينة

والكلام التافه ده

بقا ممكن للبشر تحقيق ثورتهم بشكل حقيقي

وفعلا بدأت الخلية في العمل بجد وتفاني منقطع النظير

وراح العديد من الشوفونيريين شهداء فداء للوطن الأم اللي كان ساعتها الكرة الأرضية

وانتشر المد الشوفونيري زي النار اللي بتسري في الهشيم

لحد ما قرر التريناصور العشرين - طبعا كان ال18 وال19 ماتوا - انه يواجه الموقف

فعمل حوالي 800 عملية اغتيال ناجحة ضد الشوفونيريين

مما دعا الشق الشوفونيري التمانين لاعلانها حرب غابات كان نصير البشر فيها

هو الشجر والنار و الماء

وفعلا تكبدت الديناصورات خسائر كتيرة جدا في هذه الحرب

وخلال دوران رحى المعارك أصدر مركز التنبؤات وقراية الودع التابع للاتحاد

بيان باحتمالية ثورة البراكين وحدوث زلازل تودي بكل من على البسيطة

وان المكان الوحيد اللي ممكن ينجو من غضب الطبيعة

هو عاصمة الثورة شوفونوريا العليا

وهو ما عرف في عصرنا الحالي بحي السيدة زينب مهد الجذور الانسانية

واتخذت فلول الشوفونيريين الهاربة من البراكين والزلازل من هذا المكان العريق مهرب لها

وتمركزت قيادة الجيش فيما يعرف حاليا بقلعة الكبش

وتمركزت القيادة تحت لواء الشق شوفونيري الأول رئيس الاتحاد بكهف تاز بلازا

وهو ما يعرف الآن بقصر الأمير طاز

وصمد الشعب الشوفونيري طويلا حتى انتهت الفترة الحرجة

وعاد السكون ليملأ وجه البسيطة

وخرج الشوفونيرون سعداء بانتصار ساندهم فيه القدربعد أن أفنى

الديناصورات عن بكرة أبيهم

********************

من هنا بدأت قرون الكفاح والنضال الشوفونيري

والتي سنستمر في الحديث عنها ان شاء الله

حتي يعلم الحاضر الغائب

أن الشوفونيريين عادوا من جديد

غصب عني

أنا آسف يا اسكندرية

وقت اللقا لسه ما حانشي

واتكتب عليا افضل بعيد عن حضنك حبة كمان

.........................................
.........................................

بجد بجد آسف

تخاريف صيام - الستة البيض بقا - الحلقة الأخيرة

كل سنة وانتم طيبين وعيد سعيد عليكوا يا رب

أكتر من حد كلمني ع الموبايل نفسوا يعرف اللي قالتهولي زيزي - خطيبة بطوط سابقا - في السر

وبصراحة يا جماعة الموضوع ده صعب جدا انه يتحكي لأنه هايجرح بطوط جدا

وأنا ترددت كثيرا وأنا أؤؤكد على كلمة كثيرا قبل أن أحكي

ولأن المواضيع السخنة تحب الكولا المشبّرة - لا مؤاخذة يا كريم بيه عبد العزيز - هدخل ف الموضوع

طبعا سيادتكوا تعرفوا ان بطوط له ابن خاله اسمه محظوظ - شاب سئيل سئيل يعني - بينهم ماصنع الحداد

محظوظ من حوالي شهرين نزل السيدة زينب وادّى ميعاد لزيزي عند اطلال قلعة الكبش المتبقية

بعد ما اتبنت مباني بديلة كتير - طبعا انا ما بعلنش عن مشاريع ماما سوزان ولا حاجة - عشان يتكلموا

و استغل محظوظ شوية زعل صغيرين بين بطوط و زيزي مايستاهلش وأكل بعقل البنية حلاوة

وجرجرها لارتكاب الخطيئة وأكلوا مع بعض درة مشوي - أكل الدرة المشوي في عرف البط بيعتبر

خطيئة كبيرة وعار لا يمسح إلا بقرطفة الريش - وبلّعوا بميه م الكولدير تخيلوا م الكولدير شوفتوا الجراأة

طبعا البنت قدام الموقف ده قررت انها تنفّض لبطوط وقبل ما تعاقب نفسها على خيانتها ليه

شافت مقالي الأخير ع البلوج وعرفت انه جبان ولازم ياخد على دماغه فقرر تكلمني وتحكيلي اللي حصل

وطلبت مني إني ما احكيش - طبعا أنا ما وعدتهاش لأني طبعا هاحكي - حاجة مقابل اني انشر على مسؤوليتها الآتي

بلا بطوط بلا نيلة ده قليل الحظ يلقا الحب مع بطة

وأكدتلي اهنا هاتتجوز محظوظ خلال شهر بالكتير بعد ما اهلها عرفوا اللي الندل عملوا - محظوظ - وجابوه

وادّولوا علقة موت بعد ما فقشوه بيلعب كورة في زينهم ومضّوه على أملاكه كلها عشان يأمنوا شره

وبكده تبقا كل الأطراف أعلنت عن وجهات نظرها وأنا أخليت مسؤوليتي من الموضوع كله

والله ولي التوفيق

***************************

ترقبوا قريبا السبق الجديد تحت عنوان

الاتحاد الشوفونيري .. أصالة تبحث عن الحداثة

تخاريف صيام 2

امبارح بالليل اتصل بيا عم دهب وصحاني من أحلاها نومه

قال إيه زعلان من الإشاعة - اللي انا طلّعتها قال - بتاعة انه مات

وقعد يزعق ويهلل في الموبايل وانا عمّال أهدّيه

وأقوله : " مش انا .. دي قناة ( أو تي في ) والله .. الله يجازيهم بقا " .. أنا مالي

فين وفين لما هدي وسمعني .. وبعدين راح مبرّقلي عينه - في الموبايل - وقال : " هي حصّلت ".. وسكت

قلت له : " هي إيه اللي حصّلت " .. قام زاغرلي

وقال لي : " مش بكلمك انت .. ده انا لقيت اتنين جنيه ونص ناقصين في حسابي

اللي في بنك دنجل الدولي .. أنا طول عمري بقول الواد ده حرامي " .. هبل صح

وقبل ما أسأله طب بتحط فلوسك عنده ليه ؟؟ .. قفل السكة في وشي

حبة كمان وأول ما نمت تاني بطوط راح متصل وفي عصبية زيادة زي عادته

سألني : " مين قال لك تفتح موضوع زيزي ده ع الفيس بوك

أنا ماصدقت خلاص هاورث واخلص بقا من نكدها .. واظبط حياتي واعيش " .. قلت في عقل بالي العيلة دي مجانين ولا إيه ؟؟

وروحت سأله : " ورثت ازاي وعم دهب حي يرزق " .. السؤال ماحرمش بردوا

رد ببجاحة : " هو احنا عندنا القانون كده

أول مايكمل حد فينا 100 سنة اللي بعديه يورثوه .. وهو يطلع معاش ويتركن ع الرف بقا

ويرحم أهالينا .. بدال ماهو كاتم على نفسنا

وبعدين انت مالك انت .. أنا بس متّصل بيك عشان أقولك

تعلن على مسؤوليتي الخاصة ان الجوازة دي مش هتتم .. قشطة ".. وقبل ما أرد

راح قافل السكة في وشي بردوا - اظّاهر إن العيلة دي مستقصداني ولا إيه - بجد التلاته خنقوني سواء عم دهب ولا بطوط ولا حتى زيزي

............................................................................................................

.....................................................................................

لا بقا موضوع زيزي ده احكيهولكوا بعدين عشان انا اتخنقت وعايز انام وهي مش ناقصة اساسا

قشطة

سامعكوا بتقولوا قشطة

يبقا سلام وتابعونا في الحلقة القادمة - ابقوا قابلوني لو حصل - إن شاء الله

تخاريف صيام

الأول وقبل كل حاجة

كل سنة وانتو جميعا طيبين

ثم أما بعد

تخيل معايا كده

لو إن عم دهب - أشهر مليونير في عالم سينيما الأطفال طبعا - مات

تفتكر أخونا العزيز بطوط هايعمل إيه؟؟

تفتكر هايصرف الفلوس في مشاريع للشباب

ولا هايساهم في حل أزمة السكان

ولا أزمة رغيف العيش

طب بلاش

هايرعى طيب بطل أوليمبي

ولا هايساعد في سداد ديون مصر

ولا هايبني بهم شوية جوامع

أعتقد إن أننا ممكن نستنتج ببساطة لو ركزنا حبة

وافتكرنا إن لا عم دهب ولا بطوط مصريين

ولا عرب ولا مسلمين حتى

هههههههههههههههههههههههههههههه

ههههههههههههههههههههههه

يعني مش هانطول منهم ولا مليم لأنهم أصلا أمريكان

واخد بالك معايا انت

أمريكان

وأسماءهم دي حركية اساسا لأنهم عملاء للسي آي ايه

طبعا مش هتفاجئ لو قلتلي ان المعلومات دي بالنسبة ليك جديدة لانج

أومال .. هو احنا بنلعب

ده أنا أول ماجالي الخبر بعت تلاتة مخبرين من عندي

واتأكدت على طول من الحكاية كلها

أصل دهب اساسا اتجوز واحدة من الناصرية كان قابلها في تكساس

ونزل مصر مع بداية القرن ال...... مش مهم

المهم بقا انه استوطن شاشات التلفزيون الهندي

وبقا من أكبر مستوردي البتنجان في اسطنبول

وطبعا عشان مايتعبش في مشواره للشغل كل يوم وهو بيحبي

اشترا شقة قريبة جنب غينيا الاستوائية

بطوط بقا حصله بعديها بعشرين قول خمسين سنة كده

وبعدين عمو اساسا بقا كان قالب عليه - دهب يعني - فحرمه من الميراث

يااااااااه ده حرمه اصلا من الميراث

يا خسارة .. لو اننا في المانيا مثلا دلوقتي كان زمان كل فلوسة راحت للحكومة

بس قليل البخت يلاقي العضم ... مدغدغ

والمثل بيقول داري عل شمعتك لحد ماتسيح

............................

..................................

.......................................

يووووووووووووووه كفاية مساج بقا

سلام

حلم ف السريع

السور العالي مسيرك .. يا تعديه .. يا يوطيلك
حتى لو في الحلم بس

***********************

امبارح قلت أأيللي - قيلولة يعني - ساعتين
الكلام ده كان حوالي الساعة 8 بالليل
طبعا هايجي حد خفيف ويقوللي القيلولة بتبقا الظهر
وردي هايكون واضح وبسيط
يا عم قضيها
نرجع مرجوعنا
انا نمت حوالي ساعتين ونص بس حلمت حتة دين حلم
حلمت ان انا روحت سوريا - في الحلم كنت مقتنع بكده - وكنت فرحان
ووواقف لالالالا قاعد على سور رفيع
وحاسس اني هقع وخصوصا انه عاااالي أوي
وأنا تخين زي ما حضرتكوا عارفين يعني ماعنديش رشاقة
ولا حمل على الكلام ده
ففضلت ابص لتحت واشوف خير اللهم ما اجعله خير
الجنبين فيهم بحر وصخور
واخوكوا بقا في العوم ايه ماقولوكوش بلالا
بس كنت حاسس ان احسنللي انط وربك يسهلها
بدلدل رجللي بس كده يا جدعان ولاقيت السور وطيييي رجللي لمست الأرض
ولقيتني ماشي على سيراميك
ييجي نفس الشخص الخفيف ويسأل ازاي سيراميك بعد البحر والصخور
هرد نفس الرد يا عم قضيها ده حلم والله العظيم
المهم اني فجأة لقيتني رايح عند ناس اعرفهم ماتسألونيش ازاي
رحبوا بيا و شالوني على كفوف الراحة
المهم ان المنظر كان خلاب خضرة وبحر
تخيلوا بقا الحلاوة
فقولت لمضيفيني ان انا عايز اتفسح وان شالل امشي ييجي عشرة كيلو
هاييجي نفس خفيف الدم ويقوللي العشرة كيلو مش كتير
هرد يا عم قضيها ابوس ايدك .. أنا تخيييييين
بس الغريب اني بسألهم احنا في مدينة ايه فسوريا
قالولي تونس
ويا عم الخفيف قبل ما تسأل
ده مجرد حلم يعني كل شئ مباح حتى لو قلولك ان القدس عربية
يالهوييييي .. قلنا بلاش كلام في السياسة .. بلاش كلام في السياسة
أرجوا من اصدقائي انهم يعذروني بشدة
اصل الحلم خلص عند المرحلة دي
وماتقلقوش ماحدش قبض عليا ولا حاجة
بس الطبيعي ان الاحلام مابتكملش وإلا كانت تبقا فين المخاطرة
ويجعلوا عامر

*********************

البحر عندي مش اي بحر
البحر في قاموسي هو
اسكندرية
يا رب طوّل ف عمري لحد ما اروحلها

بعد منتصف الليل

اليوم اللي بيفوت
هو اليوم اللي كان لازم نمسك فيه
بإيدينا وسنانّا

******************

دلوقتي الساعة حوالي واحدة ونص بالليل
وتقريبا من كتر هذياني قررت أنزّل بوست .. عن إيه ؟؟
والله ما اعرف بس انا هاتكلم وبس

النهارده كنت قافل موبايلي طول النهار فتحته تلات مرات
مرة عشان اكلم سلمى صلاح واقولها كل سنة وانت طيبة
ماتستغربوش أحنا آه مش صحاب قوي بس هي بنت جدعة وتستحق
المرة التانية كلمت صديقي اللدود شادو ( بتاع البوست قبل اللي فات ) اسأله هنتقابل بكرة أمتى ؟؟
م احنا من ساعة م اشتغلنا مع بعض وبنتقابل ليلاتي - حاجة تنقط - خناشير في وش خناشير
هتسألو مين الباقيين .. هاقولكوا من باب فضح الأسرار
بنتقابل مع وائل فتحي وخليل عز الدين و رامي عادل - بتوع جماعة ابدأ - و آخرين
عشان عاملين ورشة كتابة مسرحية بتتكلم عن ................... بس بس
أنا كده هتحول من واحد بيدردش لواحد بينقل أخبار عسكرية غاية في الخطورة
ههههههههههههههههههههههههههههههههههههههههه
إيه اللي أنا بقوله ده ؟؟ عسكرية إيه وبتاع إيه ؟؟
المهم عشان م انساش أكتر مكالمة شغلتني .. كلمت حد قريب مني جدا جدا جدا - أو المفروض - اطمن عليه
كان بقالو مده طويلة مابيردش على تليفوناتي قال إيه حظي وحش معاه
دايما كل اما أكلمه يكون في مانع للرد .. ولو انه في الحقيقة قاللي انه كمان بيمر بحالة نفسية مش قد كده
وبالتالي أنا عذرته 90 % ويفضل الباقي محل زعل
بس حسيت في صوته بحاجة مختلفة .. حاجة مايحسهاش غير واحد قريب من واحد قوي
بصراحة .. أنا كنت محتاج للإنسان ده فعلا في لحظة ما
وكنت محتاج اقف جنبه في لحظة تانية
وهو اللي اختار في الحالتين إنه ياخد جنب .. ويبعد .. ليييييييييييييييييييه ؟؟ والله ما فاهم
يا من اتحدث عنه .. الصداقة تستحق الكثير .. فلا تخذلها

الفترة اللي فاتت .. قربت من مجموعة جميلة أوي - اللي كنت بتكلم عنهم فوق - واستمتعت بصحبتهم
شباب فيه أمل وحيوية ورغبة .. بجد لسه بيعرفوا يحلموا ف ابتديت أحلم تاني معاهم

لما درويش مات أنا عيطت كتير و اللي كانو معايا عيطوا كتير
ورغم الحزن على ضياع القيمة .. والدموع اللي غطت أحاسيسنا
بس بجد حسينا ان اننا لسه بني آدمين

لو فاضل بيني وبين الموت خطوة .. بردوا هحلم ببكرة
ياجوز مايكونش ميعادي لسه جه

محتاج أجازة من كل حاجة
ونفسي رمضان ييجي لأني بحب الشهر ده فعلا
بس نفسي يعدي كمان عشان أخدها

الصبر سلسلة مفاتيح مش بتاعتك
مهم جدا تختار المفتاح الصح

*******************

مادمتي بتطلعيلي في كل أحلامي
ليه بقا .... عمرك ماكنتي جنبي
أبوس إيدك فوتيني في حالي

حداد إلى ..... حين

العظيم
محمود درويش
الذي تربينا بين يديه
الذي علمنا معنى الثورة والحب
مات

العين التي كنا نرى بها
جفت
اللسان الذي تبقى لنا
قطع
القلب الذي طالما نبض بالحياة ولها
توقف
روحنا نضبت

ارفعوا رايات الحداد
وابكوا أنفسكم

يفشل .. فشل .. فاشل

النهايات

ماهي إلا بدايات جديدة

لعالم يختبئ خلف القدر

........................

دايما كنت بسأل نفسي هو أنا فاشل ؟؟ وكانت الإجابة كل مرة بتيجي ناقصة .. طعمها ماسخ كده

زي مرة بعت رسالة لواحد صاحبي ( شادو ) بقوله : الوقت اتأخر وأنا ع القهوة مع فيصل بنتكتك م البرد .. نقعد ولا نمشي

فبعتلي رسالة كاتب فيها بمنتهى البساطة : لسه ما خلصتش

أفهم أنا إيه بقا من لسه ماخلصتش دي .. أقعد ولا أمشي

فبعتله رسالة تانية يمكن يريحنا بإجابة كتبتله فيها : يا ابني حدد نقعد ولا نمشي

رد عليا برساله كاتب فيها إجابة ألعن وأضل : أوك

أوك دي بقا على إيه يعني المشيان ولا القعاد ؟؟؟؟؟؟؟؟

هو ده نفسه إللي بيحصللي مع نفسي لما بسألها .. تخيلوا بقا معايا ببقا متنرفز ومتضايق ومتلخبط قد إيه ؟؟

فبروح أسأل حد م اللي يعرفني ... مش بصيغة سؤال طبعا .. إنما أقول على سبيل المثال .. أنا حاسس إني فاشل

والإجابة بتجيلي بنسبة 100 % هي هي : لا طبعا أوعا تقول على نفسك كده .. ده انت عندك أم وأب زي العسل .. وأخت بتحبك موت

ده انت نزلت ديوانين شعر ( وإيه يعني ) .. وكسبت مسابقة الساقية التشجيعية ( هي حاجة تفرح بس مش للدرجة دي ) .. وبتشتغل في صندوق التنمية الثقافية ( على أساس إنه نفس مجالي يعني .. صح ) .. وبتربي جيل جديد في المركز عندك ( والله ماهيشفعلي .. أساسا دول أول ناس هايبيعوني لما يوصله للي هما عايزينه ) وعندك صحاب كتير بيحبوك .. وعندك حضور عالي ( وغياب أعلى ) .. عايز إيه تاني

هو احنا على أي أساس بنقيس الفشل .. اعتقد ان اننا بنقيسه على اللي احنا بنحلم نحققه وحققنا قد إيه منه أو أنا على الأقل بفكر كده

وبالتالي لأني بحلم كتير جدا مهما عملت هفضل فاشل في وجهة نظري ( طبعا أنا كده بواسي نفسي وببرر ) وعمري ما هنجح

بس اللي يعرف مقياس تاني غير موضوع ( إللي الناس شايفاه ) ييجي يقوللي لأني فعلا عيان بالسؤال ده .. هو أنا فاشل ؟؟

أنا بجد محبط وتعبان جدا جدا .. ومش طايق أي حاجة وأحلامي مشعلقة في الهوا ( الجديدة طبعا ما أنا ماببطلش أحلم ) وشكلها هتقع تتكسر

بجد نفسي أروح اسكندرية موووووووووت .. بس بعد ما المصيفيين يرجعوا عشان الزحمة .. وطبعا رمضان مارحمنيش وأجّل الرحلة

وكأني في مؤامرة عليا ( طبعا بستهبل من كتر الخنقة بس ) ونفسي تخلص بقا .. والله شكلي هايحصللي حاجة في دماغي

......................

البدايات

طريق فرعي لنهايات

يوصل إلى نهايات أخرى

الحزن حزن .. مش موت

أنااااااااااا مش هامووووووووووت ناقص عمر

مسيري أجيلك يا إسكندرية

بلاغ هام

إلى محمد عز الدين إبراهيم

القاطن بر نفسه

لا تتعاطى ذاك الحلم

الحلم فيه سم قاتل

إلى كل سلطات روحي

أغلقوا المنافذ

وابتنوا الأسوار عند الحدود

حلم ما يهدد المدينة

خذ قسطا من الراحة

وتعلم كيف يكون الحلم

البت إسكندرية

عشان وحشتني أوي .. ونفسي أروحلها
مقطع من أغنية كتبتهلها

البت أم الغوايش وجونلّة وشعر هايش


وملاية لف سودة وإيشارب وقلب طايش


واقفة ع الشط ترقص وتغني للمراكب


وتقول يا موج صاحبني ده أنا اسمي إسكندرية

ثم أمّا بعد

قدر كبير من الأشياء التي كانت تستحق في الماضي
أصبحت الآن محض مساحة فارغة
تعطي حدودًا أكثر للسماء
وكلما ضاق الأفق كلما جاش الصدر بتلك الأحاسيس العقيمة
الحزن ، الهم ، الألم ، مرارات الانتظار

لماذا نسير في طرق عديدة دون أن ندري كونها تترك داخلنا أثر بحجم سيرنا فيها ؟؟
لماذا نفرض أننا أقوياء في ذروة ضعفنا ؟؟
لماذا نحاول رغم أننا لن ندرك القافلة ؟؟

فقط نود أن نجد سببًا للحياة
وهل نجده ؟؟

مرور الكرام هدف يحمل طابع الاستحالة لأمثالي
ترك الأثر هو قانوني الأول
ولو كان جرحًا بسيطًا في جبين

الأحلام تتغير
يكفي أن تسأل نفسك بعد أن يغمرك شعور السلام
وتشعر داخلك بهذا الخدر اللذيذ .. وماذا بعد ؟؟

صل قبل أن يصلَّى عليك
قل الصدق ولو أفقدك الكثير من صورك المبهرة
كن حقيقة نادرة لا سراب دائم
دع عنك ثوب المقاتل وارتديك أنت للمرة الأولى

هي لن تصبح .. وأنا يمكنني أن أولد من رحم الحقيقة

فرهده

سور على ناصية بيت

ع الحيط متشعلق واد غلبان

خايف لكلاب السكة تشوفه

من خوفه

شموا الريحة وجريوا عليه

نهشوه

وفاتوه من غير جناحات

دمعاته بتغرس صوابعها

ف تلابيب الأرض

النزف اتمكن من بواقيه

وف لحظة نشوة

حاول يتشعلق تاني

فمات

يا ريت تنوروني

مناقشة ديواني

حواديت نص الليل

هتبقا إن شاء الله يوم السبت اللي جاي الساعة 6.30 مساء

في اجتماع جماعة جلسة ثقافية بحديقة نقابة التشكيليين
دار الأوبرا المصرية


وهيناقش الكتاب بشكل أساسي



الناقد / جمال العسكري
الناقد / أحمد حسن
الشاعر / مصطفى علي


وطبعا مرحبا بمشاركة كل أصدقائي لو حبوا ينوروني

مش من أشعاري .. بس كان نفسي

شاكٍ إلى البحر اضطراب خواطري

فيجيبني برياحه الهوجاء

ثاوِ على صخرٍِ أصمَّ وليت لي قلبٌ

كهذي الصخرة الصمَّاء

بحر بلا شطآن

سؤال اسأله لنفسي من حين لآخر
من هم البشر الحقيقيين في حياتي ؟؟
ومن يمكن أن تعده حقيقيا من عدمه ؟؟
سؤال أزعجني حتى أدركت حقيقة الأمر
من ممن تعرف تركا أثرا في حياتك ؟؟
إن وجدت فهنيئا لك إن كان خير
وتهنئتي الكبرى أنك وجدت شخصا حقيقيا في حياتك
وما أقلهم


سيل آخر من الأسئلة أزعجني بشده حين طرحته على نفسي
هل أهتم فعلا بتكوين صداقات ؟؟
هل أحتاج لصداقة غيري ؟؟
هل من حولي يكنون لي ما أكنه لهم ؟؟
هل يحتاجون صداقتي ؟؟
هل تعني الصداقة لديهم ما تعنيه لي ؟؟


هل يظل صديقي الذي لا أعلم سبب غضبه مني على غضبه ؟؟
و إن صفح .. هل حينها سأكون على قدر حبي له ؟؟


هل ستبقى من اعتبرها ابنتي .. ابنتي ؟؟
أم ستنكرني في يوم من الأيام ؟؟


هل سيبقا أخي الذي اخترته على حاله ؟؟
أم سيمل كونه أخي ؟؟


هل أخطأت عندما اخترتها صديقتي المقربة ؟؟
هل ندمت هي أنها كانت أم تحمل هذه الذكرى الجميلة بداخلها ؟؟


هل تعرف حبيبتي التي مازلت أحب أنني لازلت كذلك ؟؟
أم ظنتني على حالي أنسى في مرور الدهر ؟؟
هل تعلم أنني كلما رأيتها أموت من اللهفة كي أقول لها
أحبك ؟؟

هل يعلم عني أحد .. شيئا حقيقيا ؟؟
وهل أنا من الحقيقيين في الدنيا ؟؟
من يتمكن من الإجابة على أي سؤال
اسأله الإجابة بنفس راضية
ليتني اهتدي

قلة فاضية

لما تحس

إنك عايش وحدك

وسط الناس

لما تلاقي الضحكة

بتهرب منك

لما تشوف الدنيا

اسود × اسود

تشعر إنك صفر كبير

مالهوش معنى

***

لما تحس

إنك زي القلة

الفاضية

عارف إن ماحدش يوم

هايقربلك

حلمك

تبقا مندّي

زي القلة بتاعة جدك

بس ما بتكملش الحلم

***

لما تحس

إنك عايز تبقا

نفسك تحلم حلم لآخره

نفسك تلعب

نفسك ترقص ع الحبال

نفسك تبقا فراشة

في وسط اصحابها

نفسك

نفسك

نفسك

لكن ما بتقدرش

***

لما تحس

بكل ده هوة

تبقا

...............

.............

.........

ريم عاطف

مين يشهد للعروسة

لما تفضل حوالي سنتين تعلم بنتك تلقي شعر

وتخليها تقرا تقريبا كل دواوين الشعرا المعاصرين ليك

وتحفظ من تراث الشعر قد ما تقدر

وتبقا بتعرف في أوزان الشعر

أحسن من شعرا كتيييييييييييييييييييييير

........................
........................

كل ده وانت بتدعي ربنا من قلبك

إن يكون عندها موهبة الكتابة

وبعدين .. هوب .. تلاقي حلمك اتحقق

يااااااااااااااااااااااااااااااااااااااااااااااااااااه

تبقا هتطير من الفرحة ومش لاقي حدود لفرحتك

هو ده اللي حصللي النهارده

يا رسمي .. يا أمل .. يا علياء .. يا إيمان .. يا مراد

يا سالم .. يا مصطفى علي .. يا خالد عبد القادر

يا عبد الجواد .. يا عبد الله .. يا أيمن

يا كل مين عارف إن ليا بنت روحية زي القمر

ريم .... بنت 13 سنة

كتبت النهارده أول قصيدة في حياتها

والله العظيم كتبت .... قصيدة جامدة جدا جدا جدا

يا جماعة أنا آسف بس والله البنت الصغيرة دي كل حياتي

بنتي بجد وماليش غيرها

وأنا فعلا مش عارف أوَّدي فرحتي دي كلها فين

فقلت أكتب بوست يصبرني لحد ما أنزل القصيدة نفسها

وده وعد في البوست الجاي إن شاء الله


مش عارف أبارك لنفسي ولا ليها

بس ع العموم واحد ..... أب وبنته وصلوا مع بعض لأول الطريق

يا رب تخليها ليا .. وتخليني عشانها

شركة المرعبين المحدودة

اتفرج ع الفيلم ده

وادعيلي

هتضحك من قلبك

ههههههههههههههههههههههههه

ولا عزاء لأمثالي

مبرووووووووووووووووووووووووووووك

لاتنين غالييين عليا أوي

الأول تهنئة من قلبي على الزواج
مبروووووووووووووووووك صديقي مصطفى الحسيني
مبررررررررروك بجد بجد من قلبي
انت انسان يستحق كل خير .. وربنا يزيدك
ويجعلها زيجة مباركة .. إن شاء الله

تهنئة تانية بس على الماجستير
لأخويا الكبير محمود رسمي إللي يستحق كتييييييير
بس الدنيا ماكنتش واخده بالها منه
ودلوقتي
يا رب تكون فاتحة خير
وأشوفه في المكان إللي يستاهله ويتمناه

مبرووووووووووووووووووك

أما أنا فهقول لنفسي .. مبروك
كل اللي فات من عمرك بيضيع هدر
ولا عزاء

عودة جديدة

وما نيّل المطالب بالتمنّي

ولكن تؤخذ الدنيا

غلابا

قدر واثق الخطا

أنت كما أنت
تضحك كثيرا .. دون سعادة
تبكي قليلا .. وداء خلف الآخر يعبث في جسدك
أنت كما أنت
ولا أحد سواك يراك
مهما حاولت عيناك القفز إلى جديد
مهما خفق قلبك وتكاثرت أحلامك من حولك
أنت كما أنت .. ولن تزيد

بينك وبين نفسك ألف موعد
فلا تواعد غيرها
ولا تنسّل خلف الفرحة خلسة

قدرك يا ذا الرحّال أن تموت

وحيدا

يوم التلات اللي جاي .. ها

يا جماعة

أنا خلاص هانزل ديواني التاني حواديت نص الليل
بجد يمكن دي الحاجة التانية اللي تفرحني
من كام شهر أو أكتر

وحفل التوقيع بتاعي
هايبقا يوم الثلاثاء الجاي 11/3
في نقابة الصحافيين - الدور الثامن
الساعة 5
وماتقلاقوش في أسانسير ههههههههههههههه
يا رب أشوفكوا هناك لأني هبقا سعيد أوي
تحياتي لكم جميعا

وداعا .. صديقي محمد ربيع

مات الصبي أبو قلب حي
عاش اللي فات مليان وجع مابينتهيش
على قد ما الوش البشوش غرقان ف ضحكة حنينة

مات الولا وسابنا ف دموع
يا بوووي وليه الهم بيطولنا فبيوتنا وينتصر
هو احنا ناقصين الجراح
تدخل وتكسر قلبنا

مات الصديق ومماتش فينا
حي في قلوبنا وسعيد
ومسيرنا نتلاقا فيوم تاني قريب
ونلم تاني بعضنا

مات الصعيدى أبو عود خضار
والقلب لسه خيره طالل ع العمار
يا رب انت برحمتك
قادر تخللي الجنة بيته ومطرحه
يا رب انت المستعان على حزننا

ألحقوني قبل ما أقولها

في حاجة بتحصل أنا مش فاهمها

لأول مرة مشاعري بتتحرك في اتجاه
أنا مش عارف أحدده
ومتلخبط جدا جدا جدا جدا جدا جدا


هو ممكن الإنسان يحب بعد ما يخرج من حالة فشل
ولا ده بيبقا مجرد وهم
وبعدين هو اللي بيحصللي - واللي مش عارف اوصفه ولا أفهمه - خدعه
قلبي بيقولي مستحييييييل
بس أنا كمان كبرت ومعنى ده إني لو حبيت يبقا لازم أتجوز
حبيت
ايه اللي أنا بقولوا ده
اللفظه دي مش بتاعتي
أنا لاعايز احب ولا أتجوز ولا نيله
أنا هو أنا - كائن يحيا بغربته بين الناس - وحيد .. غريب .. مش فارقة
ماينفعش قلبي يدق بدون إذن


أنا حبيت واحده تلات سنين آه .. بس كنت بحس إني أبوها
أكتر من أي حاجه تانية
إنما ......... البنت دي
حالة مختلفة تماما
إحساس مندفع زي الصاروخ ومش عارف أوقفه


أنا معظم البنات اللي اعرفهم أصدقائي وبمعنى الكلمة
وأنا اللي أكون صديق ليها ماتنفعش تكون حاجة تانية خااالص
بس هي مش عارف أخليها صديقتي ...... ومش عااايز
ومش فاهم

بس كفاية ... أنا تعبت



يا رب أنا عملت إيه ؟؟
عشان يحصلي كده

رسالة

إليكم

لقد أوشك رصيدكم على النفاذ
يرجى إعادة شحن الصداقة


إليها
عفوا لقد نفذ رصيدكم
هذا الرقم غير موجود بالخدمة

مغلق لأسباب كثيرة

آسف

لكن الكتابة في هذه الصفحة الآن

هي محض هزل

تحياتي

تحويلة

دبّس حكاوي أجندتك
فى الذكريات
لملم مرارها بحلوها ف السندره
إقفل ضرفهاع القديم
واديها ضهرك
إنطلق
إاوعاك تبص وراك

تقع

تشتاقلها
... ... ... ...


ف البانيو سقّط كل شئ
جلدك
مشاعرك
دنيتك
الدش غاوي غنوتك
دندن معاه
" الدنيا ريشه ف هوا
طايره بغير جناحين
واحنا النهارده سوا
وبكره هنكون فين "
... ... ... ...


ادخل بجرأه ع الدولاب
غير ملامح هدمتك
ولِّد
من الجوه العليل

إنسان جديد
إديله حلم يعيش معاه
أخرج من اللحظه اللى عدت
ع اللى جاي
حاول تعيش
... ... ... ...


دراعات شارعكو مفتوحين

مستنياك
إنت الوليد
وسنين حياتك
ماشيه جنبك
ع الرصيف
بتطمنك
خدها ف حضنك
حسها
إحساس بيضحك
إضحك .. وسيب الضحكه
ترمح ف الخلا
إضحك .. وغير شئ بشئ
إضحك .. بفرحه
العمر ف إيديك كمله
واياك تحسس ع اللى فات
تلقاك رجعت

السندره

هل من مزيد؟

عندما تتحكم الأقدار

ولا تجد حولك من يشعر بك

عندما يتفرق الأصدقاء المتجمهرون من حولك

دون عمد .. تشعر بالوحدة والضياع

تمارس فعل الحزن في استكانة وهدوء وربما .. تعود

صديقة تحاول أن تفيقك بالصدمة .. فتزيدك هما

أخت كبيرة ألهاها الكثير عن رؤيتك تتألم .. لتساعدك

صديقة كانت .. والآن رغم أنكم لاتزالوا أصدقاء - كما يقال - مقربون

لم تعد تراك من خلف الأقنعة

أخ هو كل ما تحتاجه في لحظة .. يرفض القدر أن يتركه لك

فتركه يدور في فلك مشحون آخر .. فما عاد يملك أن يساندك

وآخرون آخرون من الكثرة بحيث تتعجب .. كيف أنهم ليسوا هنا

عندما تراك وحيدا .. تنازعك صورتها الحياة

عندما تصدمك ببقائها في لحظة ظننت فيها أنها رحلت

ليس من السهل النسيان

الآن فقط أصدق ما كنت أرفض

مهما كانت أسحلتك للنسيان .. وارد جدا أن تتجرد منها وتقف عاجزا

عاري المشاعر.. لا يغطيك سوى حبها .. والألم

صمود

أراك عصي الدمع شيمتك الصبر

أما للهوا نهي عليك ولا أمر

بلى مشتاق وعندي لوعة

لكن مثلي لا يذاع له سر

أبو فراس الحمداني